Võromaa kiräniku'

Sais Tammula järve rannan,

Lauluesä avvusammas.

Om Urvastõ kihlkunnast peri,

Kangro Bärni ja Heibergi Mari.

Osola kalmuaian puhkas,

kirämiis Iheri Rihhard.

Pärlijõe ilosast Sännäst,

Jaik, Adson - ränsivä vällä.

Lattikul Karula juurõ',

Uibopuu siiä' sai võõrsilt.

Kitä' Võro kiränikku,

uma keele vaimorikkust.

           OOO

Vanaesä piibujutu'

Uman külän võta naanõ vagunõ,

võõran vallan vaihta hobõnõ.

Sis pulmasõitu kerkotiil,

kasvai traavi panõ' tõistõ iin.

Tiiä', om laiskus vaisuse veli,

a viks tüü talo rikkuse esä.

Ku' varandus sai kotoh tuudu,

siis pühhi pia' sakstõ muudu.

Kiä kõrtsi kaardilavvan kappas,

tuul viha villä võt ja talo takka.

Pall'alt lahkõ süä tuu ello lepitust

ja hää veski vill'ä kotti jahvatas.

Siin ilman kõgõst üle saat,

a pidämä kääpän iks kinni jäät.

             OOO

   Latsõ pelgüse'

Om piirirahval hürske pull,

möirgäs, pusklõs, täütsä ull.

Ussaida tulnu kuri rästik;

lusti karglõs linavästrik. 

Kellarin üüsisassi pesä,

verenudsijat näütäs esä.

Ku' talon umbõnõ vaikus,

tsirgupoigi ründäs haugas.

Murdja elläi pümmen välän,

varguis' luuras susi, nälän.

Koolnu kalmun heräs ello,

kodokäüja kondas küllä.

Olkõ suvi, süküs, talv,

lats iks imä-esä hoolõ all.